اسلام آباد۔10ستمبر (اے پی پی) چیئرمین سینیٹ سید یوسف رضا گیلانی نال آسیان انٹرپارلیمانی اسمبلی (اے آئی پی اے) دی سیکرٹری جنرل دی ملاقات اچ خطے اچ امن، ترقی اتے پارلیمانی تعاون کوں ودھارا ݙیوݨ تے اتفاق تھیا اتے ڈیجیٹل اکانومی، قابلِ تجدید توانائی، موسمیاتی تغیر دے اثرات، تعلیم اتے انفراسٹرکچر دے شعبیاں اچ تعاون ودھاوݨ دے امکانات تے وی تفصیلی ڳالھ مہاڑ کیتی ڳئی۔ بدھ کوں سینٹ سیکرٹریٹ توں جاری بیان موجب چیئرمین سینیٹ سید یوسف رضا گیلانی نال انہاں دی رہائش تے آسیان انٹرپارلیمانی اسمبلی (اے آئی پی اے) دی سیکرٹری جنرل آرستی روزائمیریانتی داتو حاجی عبد الرحمن ملاقات کیتی۔ سید یوسف رضا گیلانی سیکرٹری جنرل دا شاندار خیرمقدم کریندیں ہوئیں پاکستانی عوام اتے سینیٹ دی طرفوں نیک خواہشات دا اظہار کیتا۔ انہاں معزز مہمان کوں اے آئی پی اے دی پہلی تریمت سیکرٹری جنرل منتخب تھیوݨ اتے انجینئرنگ تے ترقی دے شعبے اچ نمایاں خدمتاں تے آسیان فیڈریشن آف انجینئرنگ آرگنائزیشنز دی طرفوں “آنریری فیلو ایوارڈ” حاصل کرݨ تے مبارکباد پیش کیتی۔ چیئرمین سینیٹ پاکستان اتے آسیان دے دیرینہ تعلقات تے روشنی پیندیں ہوئیں آکھیا جو پاکستان 1993ء اچ آسیان دا “سیکٹورل ݙائیلاگ پارٹنر” بݨیا ہا اتے ایں دے بعد سانجھے تعاون دا دائرہ “آسیان ۔پاکستان جوائنٹ سیکٹورل کوآپریشن کمیٹی (AP-JSCC) دے تحت ٻیا وسیع تھیا۔ انہاں ݙسایا جو پاکستان 2022ء اچ اے آئی پی اے دا “آبزرور” بݨیا اتے اوں ویلھے توں ہر سال ایں دے اجلاساں اتے فورمز اچ بھرپور شرکت کریندا پئے۔ ملاقات اچ آئی ایس سی دی سفیر، مصباح کھر وی کانفرنس دے وژن اتے تیاریاں تے روشنی پاتی۔ انہاں تریمتاں کوں با اختیار بݨاوݨ دے پاکستان دے وژن کوں اجاگر کیتا اتے آکھیا جو آئی ایس سی امن، ہم آہنگی اتے مکالمے دا مؤثر پلیٹ فارم اے۔ چیئرمین سینیٹ تریمتاں کوں با اختیار بݨاوݨ، مساوات، زندگی دے ہر شعبے اچ شمولیتی اتے جمہوری طرز حکمرانی کوں پاکستان دیاں ترجیحات قرار ݙیندے ہوئیں آکھیا جو پالیسی سازی اتے سفارت کاری اچ تریمتاں دے کردار کوں ودھارا ݙیوݨ پاکستان دی ترقیاتی حکمت عملی دا بنیادی ستون اے۔ ملاقات اچ ڈیجیٹل اکانومی، قابلِ تجدید توانائی، موسمیاتی تغیر دے اثرات، تعلیم اتے انفراسٹرکچر دے شعبیاں اچ تعاون ودھاوݨ دے امکانات تے وی تفصیلی ڳالھ مہاڑ کیتی ڳئی۔ سیکرٹری جنرل اے آئی پی اے خطے اچ پارلیمانی مکالمے اتے تعاون کیتے پاکستان دے ودھدے ہوئیں کردار دی تعریف کیتی اتے آئی ایس سی دے قیام کوں ویلھے سر اتے جامع اقدام قرار ݙتا۔ انہاں اے آئی پی اے ولوں علاقائی تعاون، عوامی روابط اتے ایشیا پیسفک خطے اچ سانجھی خوشحالی دے ودھارے دے عزم دا اعادہ کیتا۔ ملاقات اچ پارلیمانی سفارت کاری کوں ٻیا مضبوطی ݙیوݨ اتے سانجھیاں قدراں دے ودھارے تے زور ݙتا ڳیا اتے خطے کوں پرامن، مستحکم اتے خوشحال بݨاوݨ دے عزم دا اعادہ وی کیتا ڳیا۔
