اسلام آباد۔7دسمبر(اے پی پی):انسٹی ٹیوٹ آف سٹریٹجک سٹڈیز اسلام آباد (آئی ایس ایس آئی) اچ” بدلدی دنیا اچ پاکستان“ دے موضوع تے ݙو ݙینھ وار ”اسلام آباد کانکلیو“جاری اے۔ ”اسلام آباد کانکلیو“ دے ݙوجھے ورکنگ سیشن دا اہتمام سنٹر فار افغانستان، مڈل ایسٹ اینڈ افریقہ کیتا۔ جاری پریس ریلیز موجب سیشن دے مقررین اچ افغانستان سانڳے پاکستان دے خصوصی نمائندے سفیر آصف درانی، افغان پارلیمنٹ دے ایوان زیریں دے سابق ڈپٹی سپیکر میرویس یاسینی اتے ٻئے شامل ہن ۔ سیشن دی نظامت ڈائریکٹر سینٹر فار افغانستان مڈل ایسٹ اینڈ افریقہ آمنہ خان کیتی ۔ ایں موقع تے آپݨے خطاب اچ افغانستان سانڳے پاکستان دے خصوصی نمائندے سفیر آصف درانی آکھیے جو افغانستان دی صورتحال پاکستان تے اثرانداز تھیندی اے تے افغانستان اچ نائن الیون دے بعد دی صورتحال دے پاکستان تے ٻہوں منفی اثرات پئن کیوں جو اوں اساکوں معاشی اتے سکیورٹی دے حوالے نال وی متاثر کیتے ۔ آپݨے خطاب اچ انہاں آکھیے غزہ دا اڄوکا بحران اے ظاہر کریندے جو ھک چھوٹی چنگاری کیویں بھاہ اچ بدل سڳدی اے ، پاکستان دا جغرافیہ جغرافیائی سیاسی اتے جیو اکنامک اہمیت رکھیندے کیوں جو اے مشرق وسطیٰ سانڳے وی ھک گیٹ وے اے۔ انہاں آکھیے پاکستان اچ تحریک طالبان پاکستان (ٹی ٹی پی) دے حملے ودھ ڳئن ݙوجھے پاسے افغانستان نال تجارت ودھ ڳئی اے تے خطے دے اندر تجارت وی ودھی اے ۔ آصف درانی آکھیے اسرائیل حماس وچال جاری جھیڑے توں افغانستان عالمی برادری دی ترجیحی فہرست اچ تلے چلیا ڳے۔ انہاں آکھیے افغانستان اچ 95 فیصد لوک خط غربت توں تلے زندگی گزریندے پئن ۔
