اسلام آباد – 26 آگسٽ (اي پي پي) وزيراعظم عمران خان واضح اعلان ڪيو آهي ته دنيا ساٿ ڏي يا نه ڏي پاڪستان جي حڪومت ۽ عوام آخري دم تائين ڪشمير سان گڏ رهندي، جمعي ڏينهن پاڪستاني قوم ٻنپهرن جو 12 وڳي کان ساڍي 12 وڳي تائين گهرن کان ٻاهر نڪري ڪشميرين سان يڪجهتي جو اظهار ڪندي، 27 سيپٽمبر تي گڏيل قومن جي جنرل اسيمبلي جي اجلاس تائين هفتي ۾ هڪ ڏينهن ڪشميرين تي ڀارتي ظلم ۽ تشدد جي خلاف پاڪستاني قوم هڪ زبان ٿي آواز بلند ڪندي، نريندر مودي تڪبر ۾ اچي تمام وڏي غلطي ڪئي جنهن سان ڪشميرين کي آزادي حاصل ڪرڻ جو موقعو ملي ويو آهي، پاڪستان ڪشمير مسئلي کي عالمي ڌيان ڏيارڻ ۾ ڪامياب ٿيو آهي. قوم کي خطاب ڪندي وزيراعظم عمران خان چيو ته اڄ آئون توهان سان رڳو ڪشمير جي معاملي تي ڳالهه ڪرڻ چاهيان ٿو ۽ اهو ٻڌائڻ چاهيان ٿو ته ڪشمير جي اڄ ڪهڙي صورتحال آهي، هيستائين اسان ڇا ڪيو آهي ۽ اڳتي ڇا ڪرڻ وڃي رهيا آهيون.
