اسلام آباد۔11اگست (اے پی پی) وزیر داخلہ محسن نقوی وزارت داخلہ اچ ترکیہ دے سفیر ڈاکٹر مہمت پیکاسی نال ملاقات کیتی ملاقات اچ پاک ترکیہ ݙوطرفہ تعلقات اتے سانجھی دلچسپی دے امورتے تفصیلی ڳالھ مہاڑ کیتی ڳئی ۔ ݙوہیں فریقین سیکورٹی، پولیس اتے سول آرمڈ فورسز دے شعبیں اچ تعاون ودھاوݨ تے اتفاق کیتے۔ ایکسچینج پروگرام دے تحت پاکستانی پولیس افسراں کوں تربیت سانڳے ترکیہ بھیجݨ دا فیصلہ کیتا ڳئے ۔ وزیر داخلہ آکھیے اڄوکے سال 14 اگست توں ترکیہ شہری مفت آن لائن ویزا گھن سڳسن ۔ انھاں مزید آکھیے ایں اقدام توں ترک بھرا تے بھیݨاں سانڳے پاکستان دا دورہ کرݨ ٻہوں سوکھا تھی ویسی او ترکیہ حکومت دی دعوت تے اکتوبراچ ترکیہ دا دورہ کریسن جتھاں سانجھا تعاون ودھاوݨ سانڳے نتیجہ خیز اقدامات تجویز کیتے ویسن۔وزیر داخلہ آکھیے پاکستانی ترکیہ کوں آپݨا ݙوجھا گھر سمجھدن ۔ملاقات اچ ترکیہ اچ قید پاکستانیاں دی رہائی تے ڳالھ مہاڑ کیتی ڳئی تے ایں حوالے نال وختی معاہدے کوں چھیکڑی شکل ݙیوݨ تے اتفاق تھئے ۔ترکیہ دے سفیر ڈاکٹر مہمت پیکاسی آکھیے ترکیہ پاکستان نال برادرانہ تعلقات کوں اہمیت ݙیندے تے مختلف شعبیں اچ پاکستان نال تعاون جاری رکھیسی ایں موقع تے وفاقی سیکرٹری داخلہ خرم علی آغا اتے ایڈیشنل سیکرٹری داخلہ رفعت مختار راجہ وی موجود ہن ے
