گزریل 24گھنٹے اچ پورے ملک اچ کورونا وائرس دے مشتبہ کیسز دی تعداد اچ 1604اتے مصدقہ مریضاں دی تعداد 112دا ودھارا تھئے ،مشتبہ کیسز دی مجموعی تعداد 5649تھی گی اے ، وائرس پاروں ملک اچ ترائے لوکاں دی موت تھئی اے ، حکومت کلوروکوئین اچ استعمال تھیونڑ آلے خام مال دی برآمد اتے اندرلے ملک ڈاکٹر دے نسخے دے بغیر ویچنڑ تے پابندی لاڈتی اے ،کورونا وائرس دے علاج کیتے 5 ہزار ڈاکٹراں کوں خصوصی تربیت ڈتی ویسی
اسلام آباد ۔ 22 مارچ (اے پی پی) وزیراعظم دے معاون خصوصی صحت ڈاکٹر ظفر مرزا آکھیے جو گزریل 24گھنٹے اچ پورے ملک اچ کورونا وائرس دے مشتبہ کیسز دی تعداد اچ 1604اتے مصدقہ مریضاں دی تعداد 112دا ودھارا تھئے ،مشتبہ کیسز دی مجموعی تعداد 5649تھی گی اے ، وائرس پاروں ملک اچ ترائے لوکاں دی موت تھئی اے ، حکومت کلوروکوئین اچ استعمال تھیونڑ آلے خام مال دی برآمد اتے اندرلے ملک ڈاکٹر دے نسخے دے بغیر ویچنڑ تے پابندی لاڈتی اے ،کورونا وائرس دے علاج کیتے 5 ہزار ڈاکٹراں کوں خصوصی تربیت ڈتی ویسی ۔ اتوار کوں اتھاں وزیراعظم دے قومی سلامتی دے مشیر معید یوسف دے رلے پریس کانفرنس کریندے ہوئیں ڈاکٹر ظفر مرزا آکھیے جو گزریل 24گھنٹے اچ کورونا وائرس دے مشتبہ کیسز دی تعداد اچ 1604دا ودھار اتھئے جیں اچ مشتبہ کیسز دی مجموعی تعداد 5649تھی گی اے مشتبہ کیسز دی کیٹیگری اچ او لوک شامل ہن جنہاں ہنڑیں ہی باہرلے ملک دا سفر کیتا ہووے یا سفر کرنڑ آلے لوکاں نال رابطے اچ رہیے ہوون ۔انہاں آکھیے جو ملک اچ کرونا وائرس دے کنفرم کیس دی تعداد 640تھی گئی اے تے گزریل 24گھنٹے اچ ایندے اچ 112دا ودھارا تھئے ، پنجاب اچ کورونا وائرس دے 152، سندھ اچ 292، خیبرپختونخوا 38، بلوچستان 55، آزاد جموں و کشمیر 1 اتے اسلام آباد اچ 11مریض ہن ۔ کورونا وائرس نال ہنڑ تئیں صرف ترائے بندے جاں بحق تھئن ۔ عالمی سطح تے ایں وائرس توں متاثرین دی تعداد ودھدی پئی اے ۔ 188ملکاں اچ مریضاں دی تعداد 3لکھ توں ودھ گئی اے ،جڈاں جو ہنڑ تئیں عالمی سطح تے ایں بیماری نال 13ہزار لوکاں دی موت تھئی اے تاں جو امید دی گال اے ہے جو انہاں اچوں 95ہزار لوک پورے صحت یاب تھی تے معمول دی زندگی دے پاسے آگن۔ حکومت دی صورتحال تے پوری نظر اے تاں جو ڈاکٹر ظفر مرزا وضاحت کیتیہ جو ہنڑ تئیں جیرھیاں معلومات ملین ایندے مطابق کلوروکوئین دے کورونا وائرس دی بیماری اچ مفید تھیونڑ دے حوالے نال پکے شواہد موجود کائنی ۔دنیا اچ ایں بیماری دی علامات دے علاج کیتے ایں دوا دے کجھ صورتاں اچ موثر تھیونڑ دی اطلاعات ہن۔ایں حوالے نال اساں ساری معلومات گھدی اے ۔ متعددی فرض دا اعلاج کرنڑ آلے ڈاکٹراں تے ماہرین دا ہک گروپ بنڑائے جیرھا جو ہک ڈو ڈینھ اچ ایں بیماری دی علامات اچ کلوروکین دی مقدار تے استعمال دے عرصے دا تعین کریسن۔ انہاں آکھیے جوکورونا وائرس دے علاج کیتے پورے ملک اچ 5ہزار ڈاکٹراں دا کریش کورس کراونڑ دا وی اہتمام کیتا ویندا پئے ایں سلسلے اچ ساری تفصیلات کوں حتمی شکل ڈے ڈتی گئی اے ۔
