اسلام آباد۔2دسمبر (اے پی پی):وزیراعظم عمران خان آکھیے جو حکومت عام بندے کوں ودھ توں ودھ ریلیف ݙیوݨ کیتے ہر ممکن اقدامات کریندی پئی اے ، مہانگ دی وجہ توں غریب لوکاں کوں ضروری چیزاں تے سبسڈی ݙیندے پیوں ، ودھ توں ودھ غریب لوکاں کوں فیدہ پڄاوݨ کیتے رجسٹریشن دے عمل کوں تکھا کیتا ونڄے ۔ اے ڳال انہاں خمیس کوں احساس راشن پروگرام متعلق اجلاس دی صدارت کریندے ہوئیں آکھی اے ۔ اجلاس اچ وزیراعظم دی معاون خصوصی تخفیف غربت سینیٹر ڈاکٹر ثانیہ نشتر، مشیر خزانہ شوکت فیاض ترین، وزیر اعلیٰ گلگت بلتستان خالد خورشید، وزیراعظم دے معاون خصوصی سیاسی امور ڈاکٹر شہباز گل سودھے متعلقہ سینئر افسران شرکت کیتی جݙاں جو وزیراعلیٰ پنجاب سردار عثمان بزدار، وزیراعلیٰ خیبر پختونخوا محمود خان، وزیراعظم آزاد کشمیر سردار عبدالقیوم خان نیازی ویڈیو لنک دے ذریعے اجلاس اچ شرکت کیتی۔ ایں موقع تے وزیراعظم آکھیے جو حکومت عام آدمی کوں ودھ توں ودھ ریلیف ݙیوݨ کیتے ہر ممکن اقدامات کریندی پئی اے ، انہاں آکھیے جو مہانگ دی وجہ توں لوکاں دی تکلیف دا پتہ اے ، اساں غریب لوکاں کوں ضروری چیزاں تے سبسڈی ݙیندے پیوں ، ایندے توں پہلے وزیراعظم کوں ݙسایا ڳیا جو احساس راشن پروگرام دے تحت ملک دے انہاں 2 کروڑ گھراݨے کوں اٹا ، گھیو اتے دالاں تے ھک ہزار روپے دی ماہانہ سبسڈی ݙتی ویندی پئی اے جنہاں دی ماہانہ آمدنی 50,000روپے توں گھٹ اے ۔ وزیراعظم کوں بریفنگ اچ ݙسایا ڳئے جو اے پروگرام 15 دسمبر توں پورے ملک اچ شروع کیتا ویسی ۔ پروگرام دے تحت کریانہ اسٹورز دی رجسٹریشن جاری اے اتے ہݨ تئیں 15000 توں ودھ کریانہ اسٹورز رجسٹرڈ تھی ڳئن ۔وزیر اعظم متعلقہ حکام کوں ہدایت کیتی جو ملک اچ ودھ توں ودھ غریباں کوں فیدہ پڄاوݨ کیتے رجسٹریشن دے عمل کوں تکھا کیتا ونڄے ۔
