اسلام آباد – 12 – سيپٽمبر (اي پي پي) وزيراعظم محمد شهباز شريف اسٽيٽ بئنڪ پاران پاليسي ريٽ ۾ 2 سيڪڙو جي گهٽتائي کي خوش آئنده قرار ڏيندي چيو آهي ته ان سان ڪاروبار ۽ معيشت کي فائدو ٿيندو، دعا آهي ته مهانگائي وانگر پاليسي ريٽ به سنگل ڊيجٽ ۾ اچي وڃي جنهن سان ملڪ ۾ معاشي سرگرمين کي هٿي ملندي، آءِ ايم ايف سان ڳالهه ٻولهه مثبت انداز ۾ اڳتي وڌي رهي آهي، غزه ۾ اسرائيلي جارحيت تي عالمي ضمير خاموش آهي، پاڪستان اسرائيلي قدمن جي مذمت ڪري ٿو. وزيراعظم محمد شهباز شريف اهڙن خيالن جو اظهار وفاقي ڪابينا جي اجلاس دوران ڳالهائيندي ڪيو. هن چيو ته ڪابينا اجلاس جي شروعات پاليسي ريٽ ۾ گهٽتائي جي سٺي خبر سان ٿي رهي آهي، پاليسي ريٽ 2 سيڪڙو گهٽ ٿي 17.5 سيڪڙو تي اچي ويو آهي جنهن سان ڪاروبار، زراعت ۽ قومي معيشت کي فائدو ٿيندو. وزيراعظم چيو ته الله ڪري اهو ڏينهن به اچي ته ناڻي واڌ وانگر پاليسي ريٽ به سنگل ڊيجٽ ۾ اچي وڃي، ان سان پاڪستان جي معيشت کي چار چنڊ لڳي ويندا. هن چيو ته قدم بقدم بهتري اچي رهي آهي ۽ مسلسل آهستي ڀڄندڙ ئي ريس کٽيندو آهي وانگر پاليسي ريٽ ۾ 2 سيڪڙو جي گهٽتائي سٺي گهٽتائي آهي، ان سان اسان جي صنعت، سيڙپڪاري، واپار، روانگي واپار، زراعت سڀني ۾ بي پناهه فائدو ٿيندو. وزيراعظم چيو ته اسان پوري ڪوشش ڪري آءِ ايم ايف سان ڳالهه ٻولهه کي سٺي طريقي سان اڳتي وڌائي رهيا آهيون، اميد ڪرڻ گهرجي ته جڏهن اهو پروگرام ٿي وڃي ته ان کانپوءِ اسان پنهنجي واڌويجهه جي شرح ۾ اضافي جي لاءِ قدم کڻنداسين، پاور سيڪٽر ۽ ايف بي آر ۾ سڌارا متعارف ڪرايا پيا وڃن، ايف بي آر ۾ بي پناهه قدمن جي ضرورت آهي، ايف بي آر چيئرمين کي بهتري جي لاءِ وقت ڏئي رهيا آهيون، ان سان ملاقات ڪندس ته هدفن جو تعين ڪري سگهبو. وزيراعظم وڌيڪ چيو ته آءِ ايم ايف جي حوالي سان اسان جي دوست، ڀائر ملڪن جن سان چولي دامن جو ساٿ آهي، انهن پوري طرح اسان جو ساٿ ڏنو آهي، انهن جيڪو ڪجهه ڪيو آهي اهو ائين ئي آهي جيئن هڪ ڀاءُ پنهنجي ڀاءُ ۽ دوست پنهنجي دوست جي لاءِ ڪري ٿو، انهن ملڪن گذريل وانگر هن ڀيري به ٻيهر انهي تاريخ کي ورجايو آهي ۽ پاڪستان جو پورو ساٿ ڏنو آهي، اهي معاملا اهڙي طرح نٿا هلي سگهن، اسان کي قرضن مان جان ڇڏرائڻي پوندي، پنهنجي پيرن تي بيهڻو پوندو، اسان هڪ ائٽمي قوت آهيون پر هر روز قرضن جي درخواستن سان اهميت ۾ گهٽتائي ٿئي ٿي. هن چيو ته اها ڪا راڪيٽ سائنس نه آهي پر عام ۽ سادي ڳالهه آهي، انهن معاملن تي پاڪستان حڪومت مڪمل لگن سان ڪوششون ڪري رهي آهي، جڏهن موقعو ايندو ته تفصيل سان ٻڌايو ويندو، آءِ ايم ايف جي مطالبن کي پورو ڪرڻ جي لاءِ ناڻي واري وزير، ڪابينا، ادارن جي سربراهن سميت لاڳاپيل عملدارن ڀرپور ڪوشش ڪئي آهي ۽ انشاءَالله ان ۾ ڪاميابي ٿيندي، چين سميت پرڏيهي آفيس ۽ ٻين دوستن پڻ ڀرپور مدد ڪئي آهي. وزيراعظم محمد شهباز شريف چيو ته فلسين ۾ اسرائيل جي ڏاڍ ۽ قتل عام جاري آهي، معصوم ماڻهن کي شهيد ڪيو پيو وڃي، اهو انساني تاريخ جو ڪارو ترين باب آهي، افسوسناڪ ڳالهه اها آهي ته عالمي ضمير ان حوالي سان خاموش آهي، گڏيل قومن، سلامتي ڪائونسل، هيگ ۾ جيتريون به قراردادون پاس ٿيون ۽ فيصلا ٿيا ان جي اسرائيل قطعي طور تي پرواهه نه ڪئي، ان کي رديءَ جي ٽوڪري ۾ اُڇلي ڇڏيو آهي، عالمي طاقتون خاموش آهن، يقينن انهن جنگبندي جون ڪوشش ڪيون ۽ قراردادون پاس ڪرايون پر انهن تي ڪيترو عملدرآمد ٿيو؟ ان جو نتيجو آهي ته گڏيل قومن جي ريليف جي 6 ڪارڪنن کي اڄ قتل ڪيو ويو، اها حالت آهي جو گڏيل قومن جو عملو جيڪو پوليو ۽ خوراڪ جو ڪم ڪري رهيو آهي ان کي به قتل ڪيو ويو آهي، جيڪڏهن ڪنهن ٻئي ملڪ ۾ ائين ٿئي ته ڪهرام مچي وڃي. وزيراعظم چيو ته اتي روزانو معصوم مسلمان شهيد ٿي رهيا آهن، ماضي ۾ به پاڪستان اسرائيلي جارحيت جي ڀرپور مذمت ڪئي آهي ۽ اڄ ٻيهر ان جي شديد مذمت ڪري ٿو پر معاملو هاڻي مذمت کان اڳتي نڪري چڪو آهي، عالمي ضمير کي جاڳڻ گهرجي ۽ پنهنجو فرض ادا ڪرڻ گهرجي.
