اسلام آباد۔8ستمبر(اے پی پی)وزیر خارجہ شاہ محمود قریشی آکھیے جو افغانستان اچ نویں صورتحال کوں نویں انداز نال ݙیکݨا چاہیدے جیندے کیتے حقیقت پسندانہ اتے زمینی حقائق توں بھرپور سوچ اپناوݨی ہوسی، اے ویلھا افغان عوام نال یکجہتی اتے حمایت کرݨ دا اے جو افغانستان دے استحکام نال ایندے ہمسایہ ممالک دا براہ راست مفاد جڑیا ہوئے، خطے اچ امن کیتے علاقائی و عالمی روابط تکڑے کرݨے ہوسن۔ اے ڳالھ انہاں افغانستان دی صورتحال تے علاقائی ملکاں دے وزرائے خارجہ دی ورچوئل کانفرنس نال خطاب اچ آکھی جیندی اڳواݨی پاکستان کیتی۔ کانفرنس اچ چین، ازبکستان، ترکمانستان، تاجکستان اتے ایران دے وزرائے خارجہ شرکت کیتی۔ وزیر خارجہ شاہ محمود قریشی آکھیا جو افغانستان دی اڄوکی صورتحال چنڳی تھیندی پئی اے، خون خرابے دا کوئی امکان نئیں ݙسدا، ایندے باوجود صورتحال حالی وی غیر واضح اتے اوکھی اے، ہمسایہ ملکاں کوں ودھ احتیاط، تعاون اتے رابطہ کاری کوں ودھاوݨا ہوسی، امید اے جو سیاسی صورتحال ٻئی چنڳی تھی ویسی، ساݙیاں کوشش ہوݨی چاہیدی اے جو افغان عوام دی بھلائی کیتی ونڄے، آپت اچ اشتراک اتے روابط ودھائے ونڄن، اساں سرحداں نال سلامتی دی صورتحال، افغان سرزمین دہشت گرد تنظیماں ولوں استعمال تھیوݨ توں بچاوݨ، مہاجرین دے چنتے توں بچݨ، منشیات سودھا کثیرالقومی جرائم روکݨ، انتہا پسنداں کوں کھنݙݨ توں روکݨ، اتے خطے اچ امن مخالف قوتاں کوں ݙکݨ تے اتفاق کیتے۔ افغانستان کوں ایں اوکھ اچ آپݨے پیریں تے کھڑا کرݨ دے قابل ٻݨاوݨا ہوسی۔ انہاں آکھیا جو اساں افغان عوام نال یکجہتی، ہک متحد، خود مختار اتے جغرافیائی سالمیت آلے افغانستان دی حمایت، افغان مسلے دا افغان حل یقینی ٻݨاوݨ، افغان سرزمین کہیں ٻعے دے خلاف نہ تھیوݨ ݙیوݨ اتے قومی اہمیت ودھاوݨ تے اتفاق کیتے جو کوئی نواں بحران نہ آوے۔ وزیر خآرجہ فورم کوں مستقل کرݨ اتے افغانستان کوں رلاوݨ دی تجویز ݙتی۔
