اسلام آباد۔27ستمبر(اے پی پی) الیکشن کمیشن ڈیجیٹل مردم شماری 2023ء دے تحت پورے ملک اچ قومی اتے صوبائی اسمبلیاں دی نویاں حلقہ بندیاں دی ابتدائی فہرست جاری کرݙتی اے ۔ الیکشن کمیشن دی طرفوں جاری تفصیل موجب قومی اسمبلی دی عمومی نشستاں دی تعداد 266 اے جݙاں جو ھک حلقے اچ ووٹراں دی تعداد 8 لکھ توں ودھ رکھی ڳئی اے ۔ پنجاب اسمبلی دی کل نشستاں دی تعداد 297 برقرار اے، سندھ اسمبلی دی کل جنرل نشستاں دی تعداد 130 اے، خیبرپختونخوا اسمبلی اچ کل عمومی نشستاں دی تعداد 115 جݙاں جو اتھاں حلقیں اچ ووٹراں دی تعداد 3 توں 5 لکھ دے درمیان اے، بلوچستان اسمبلی دی نشستاں دی تعداد 51 جݙاں جو حلقیں اچ ووٹراں دی تعداد 2 توں 4 لکھ دے درمیان رکھی ڳئی اے۔ اے تفصیلات الیکشن کمیشن دی ویب سائٹ تے وی ݙتیاں ڳئن ۔ ابتدائی حلقہ بندیاں دے نقشہ جات وی ویب سائٹ تے موجود ہن انہاں حلقہ بندیاں دی اشاعت دے 30 ݙینھ (27 اکتوبر) تئیں اعتراض یا تجویز جمع کرائی ونڄ سڳدی اے جیڑھا جو سیکرٹری الیکشن کمیشن دے ناں ہوسی ۔ تجویز یا اعتراض جمع کراوݨ کیتے لازم اے جو اعتراض کنندہ متعلقہ حلقے دا ووٹر ہووے۔ الیکشن کمیشن دی طرفوں اے اعتراضات نمٹاوݨ دے بعد 30 نومبر کوں حتمی انتخابی فہرستاں جاری کیتیاں ویسن ۔ الیکشن کمیشن دی طرفوں جاری اعلامیہ موجب کہیں وی صوبے دی کل نشستاں کوں ووٹراں دی مجموعی تعداد نال تقسیم کرتے ہر حلقے اچ کوشش کیتی ڳئی اے جو مساوی ووٹرز ہوون تاں جو بلوچستان اچ کئی نشستاں مختلف ضلعیں تے وی مشتمل ہن۔ قومی اسمبلی دی وفاقی دارالحکومت توں ترائے ، پنجاب توں 141، سندھ توں 61، خیبرپختونخوا 45 اتے بلوچستان اچ 16 نشستاں ہن جݙاں جو پورے ملک اچ کل 60 قومی اسمبلی دی مخصوص نشستاں ہوسن ۔ ایویں پنجاب اسمبلی دی جنرل نشستاں دی تعداد 297 جݙاں جو تریمتاں دی 66 اتے نان مسلم دیاں 8 نشستاں ہوسن ۔ سندھ اچ جنرل نشستیں 130، تریمتاں 29، نان مسلم دی 9 نشستاں ہوسن ۔ خیبرپختونخوا دی 115 جنرل، 26 تریمت ، 4 غیر مسلم جݙاں جو بلوچستان دی 51 جنرل، 11 تریمت تے 3 غیر مسلم کیتے ہوسن ۔ قومی اسمبلی کیتے پنجاب اچ ھک نشست کیتے آبادی دی گھٹ توں گھٹ تعداد 9 لکھ 5 ہزار 595، سندھ کیتے 9 لکھ 13 ہزار 52، خیبرپختونخوا کیتے 9 لکھ 7 ہزار 913، بلوچستان کیتے 9 لکھ 30 ہزار 900 جݙاں جو اسلام آباد کیتے 7 لکھ 87 ہزار 954 رکھی ڳئی اے۔ ایویں پنجاب اسمبلی اچ جنرل نشست کیتے 4 لکھ 29 ہزار 929، سندھ 4 لکھ 28 ہزار 432، خیبرپختونخوا 3 لکھ 55 ہزار 270 جݙاݨ جو بلوچستان کیتے 2 لکھ 92 ہزار 47 رکھی ڳئی ۔
