اسلام آباد – 09 جنوري (اي پي پي) صدر ممنون حسين چيو آهي ته پاڪ چين اقتصادي لنگهه مان ڀرپور فائدو کڻڻ جي لاءِ نئين نسل جو ڪردار اهم آهي ۽ پاڪستان ۾ پيدا ٿيندڙ نون امڪانن مان فائدو کڻڻ جي لاءِ شاگرد پاڻ کي ڀرپور انداز ۾ تيار ڪن. هن اها ڳالهه ايوان صدر ۾ سنڌ مدرسته الاسلام يونيورسٽي ڪراچي جي شاگردن جي وفد سان ملاقات دوران چئي. صدر چيو ته سنڌ مدرسته الاسلام يونيورسٽي کي قائداعظم جي نسبت جي ڪري ٻين ادارن کان مٿانهون مقام حاصل آهي. هن چيو ته يونيورسٽي معياري تعليم جي فروغ لاءِ پنهنجو ڪردار ادا ڪري رهي آهي. ضرورت ان ڳالهه جي آهي ته شاگرد پاڻ کي جديد تعليم سان ليس ڪري معاشي ترقي ۾ فعال ڪردار ادا ڪن.
