اسلام آباد۔10اگست (اے پی پی):وزیر خارجہ شاہ محمود قریشی آکھیے جوپاکستان، نائجر سودھے افریقی ملکاں نال تجارتی، اقتصادی و کثیرالجہتی شعبہ جات اچ ݙوپاسے تعلقات چاہندے ، اے ڳال انہاں پاکستان دے دورہ تے آئے نائجر دی قومی اسمبلی دے صدر سینی اومارو نال ڳال مہاڑ کریندے ہوئیں آکھی اے ، جنہاں منگل کوں وزارت خارجہ اچ وفد دے رلے ملاقات کیتی ، ڳال مہاڑ اچ ݙو پاسے تعلقات ،مختلف شعبہ جات اچ تعاون دے ودھارے سودھے سانجھی دلچسپی دے امور تے ڳال کیتی ڳئی ۔وزیر خارجہ آکھیے جو پاکستان اتے نائجر وچال برادرانہ تے مستحکم، تعلقات ہن،پاکستان، وزیر اعظم عمران خان دے وژن دی روشنی اچ ، اقتصادی ترجیحی ایجنڈے تے عمل کریندا پئے ۔وزیر خارجہ نائجر دے دارالحکومت نیامے اچ او آئی سی وزرائے خارجہ کونسل دے سنتالیویں اجلاس دے انعقاد تے بھرپور میزبانی دی تعریف کیتی تے نائجر ولوں مقبوضہ جموں و کشمیر دے حوالے نال قرارداد دی بھرپور حمایت تے نائجر قیادت دا شکریہ ادا کیتے۔ ݙوہیں وزرائے خارجہ پاکستان اتے نائجروچال پارلیمانی تعاون دے معاہدے دا خیر مقدم کیتے۔صدر نایجر اسمبلی سینی اومارو اوکھیے ویلھے پاکستان دی طرفوں کیتی ڳئی معاونت دی تعریف کریندے ہوئیں پاکستان دی قیادت دا شکریہ ادا کیتے۔
