اسلام آباد۔21اکتوبر(اے پی پی)صدر مملکت ڈاکٹر عارف علوی تیز رفتار اقتصادی ترقی سانڳے اکائونٹنگ اتے مالیاتی شعبے سودھا ملک دے ٻعے شعبیاں اچ ڈیجیٹل ٹیکنالوجی اتے آئی ٹی ٹولز سودھا جدت اپناوݨ دی لوڑھ ݙیندے آکھیے جو پاکستان کوں اپݨے تعلیمی نظام اچ آن لائن اتے ہائبرڈ سیکھݨ کیتے یونیورسٹی توں فارغ التحصیل لوکاں اتے پیشہ ور لوکاں دی تعداد ودھاوݨی چاہیدی اے۔ اے ڳالھ انہاں ایوان صدر اچ انسٹی ٹیوٹ آف چارٹرڈ اکائونٹنٹس آف پاکستان (آئی سی اے پی) دے کانووکیشن نال خطاب اچ آکھی۔ صدر آئی سی اے پی اشفاق یوسف تولہ، نائب صدور، اکائونٹنگ اتے مالیاتی شعبے دے اراکین اتے طلباء تقریب اچ شرکت کیتی۔ صدر مملکت فیصلہ سازاں اتے اداریاں کوں آکھیے جو او ہک موثر نظام قائم کرن تاں جو نویں اتے ابھردیاں ٹیکنالوجیز اپناوݨ کیتے لاگت دا اندازہ لا تے استعمال کیتا ونڄے۔ انہاں سرکاری شعبے کیتے اکائونٹنگ اتے آٹومیشن دے ”ڈبل انٹری“ دے نظام کوں اپناوݨ د لوڑھ تے زور ݙیندے آکھیے جو ڄڳ دیاں معیشتاں آئی سی ٹی اتے ڈیجیٹل ذرائع دی مدد نال آٹومیشن، تیز رفتار مالیاتی ماڈیولز اتے محفوظ لین دین نظام دو تیزی نال منتقل تھیندی پئی اے۔
