اسلام آباد۔1ستمبر(اے پی پی)وزیر خارجہ شاہ محمود قریشی چتائے جیکر افغانستان کوں ولا کلہا چھوڑ ݙتا ڳیا تاں ایندے نتیجے چنڳے نہ نکلسن، ملک ولا خانہ جنگی وات آ سڳدے اتے خطے اچ دہشت گردی دی نویں لہر کھنݙ سڳدی اے، افغانستان اچ جنگ مکاوݨ اتے انخلا سانڳے پاکستان دے تحفظات ہک پاسے سٹ ݙتے ڳین۔ برطانوی نیوز چینل ’’سکائی نیوز ‘‘کوں انٹرویو اچ انہاں افغانستان تون انخلا دی صورتحال تے تنقید کیتی اے جو انخلا دا عمل ذمہ دارانہ کائنا ہا، ہݨ مغرب کوں چاہیدے جو او طالبان دی نویں حکومت کوں آزماوے جو او آپݨے وعدے نبھاون، جیکر مغرب طالبان نال ڳالھ مہاڑ چھوڑ ݙتی تاں افغانستان ولا خانہ جنگی دا شکار تھی سڳدے۔ وزیر خارجہ طالبان دے ابتدائی بیانات کوں مثبت قرار فیندے امید کیتی جو طالبان کثیر القومی ملک اچ اجتماعیت آلی حکومت ٻݨیسن۔ انہاں آکھیا جو افغانستان کوں ولا کلہا چھوڑݨ دا آپشن ٻہوں خطرناک ہوسی جیندے نال افغان عوام بحران دا شکار تھی ویسن جو ایہو ڄھیں غلطی پہلے وی کیتی ڳئی اے۔ انہاں آکھیا جو عالمی برادری ماضی دیاں غلطیاں نہ دوہراوے،طالبان وی ذمہداری ݙکھاون، انہاں دی ہݨ سوچ اتے رویہ چنڳاں اتے پہلے توں نویکلا ہووݨا چاہیدے، طالبان کوں حالات دے مطابق سمجھداری نال عالمی رائے اتے اصولاں دا احترام کرݨا ہوسی جو افغانستان اچ وݙے پیمانے تے انسانی امداد دی لوڑھ پوسی نتاں افغانستان اقتصادی اوکھ اچ گھر ویسی۔
.jpg)
